sukut-e-sham-e-khizan hai qarib aa jao

sukut-e-sham-e-khizan hai qarib aa jao
bada udas saman hai qarib aa jao

na tum ko khud pe bharosa na hum ko zom-e-wafa
na etibar-e-jahan hai qarib aa jao

rah-e-talab mein kisi ko kisi ka dhyan nahin
hujum-e-ham-safaran hai qarib aa jao

jo dasht-e-ishq mein bichde wo umr bhar na mile
yahan dhuan hi dhuan hai qarib aa jao

ye aandhiyan hain to shehr-e-wafa ki khair nahin
zamana khak-fishan hai qarib aa jao

‘faraaz’ dur ke suraj ghurub samjhe gaye
ye daur-e-kam-nazaran hai qarib aa jao

This Post Has 3 Comments

Leave a Reply