silsile tod gaya vo sabhi jaate jaate

silsile tod gaya vo sabhi jaate jaate
varna itne to marasim the ki aate jaate

shikwa-e-zulmat-e-shab se to kahi behtar tha
apne hisse ki koi shama jalate jaate

kitna asaan tha tire hijr mein marna janan
phir bhi ek umr lagi jaan se jaate jaate

jashn-e-maqtal hi na barpa hua varna hum bhi
pa-ba-jaula hi sahi nachte gaate jaate

iski vo jaane use pas-e-vafa tha ki na tha
tum ‘faraz’ apni taraf se to nibhate jaate

Leave a Reply