nahin ki nama-baron ko talash karte hain

nahi ki nama-baron ko talash karte hain
hum apne be-khabron ko talash karte hain

mohabbaton ka bhi mausam hai jab guzar jaye
sab apne apne gharon ko talash karte hain

suna hai kal jinhe dastar-e-iftikhar mili
wo aaj apne saron ko talash karte hain

ye ishq kya hai ki izhaar-e-arzu ke liye
harif nauhagaron ko talash karte hain

ye hum jo dhundte phirte hain qatl-gahon ko
dar-asal chaaragaron ko talash karte hain

riha hue pa ajab haal hai asiron ka
ki ab wo apne paron ko talash karte hain

‘faraaz’ daad ke qabil hai justuju unki
jo hum se dar-badaron ko talash karte hain

This Post Has One Comment

Leave a Reply