KHamosh ho kyun dad-e-jafa kyun nahin dete

KHamosh ho kyun dad-e-jafa kyun nahin dete
bismil ho to qatil ko dua kyun nahin dete

wahshat ka sabab rauzan-e-zindan to nahin hai
mehr o mah o anjum ko bujha kyun nahin dete

ek ye bhi to andaz-e-ilaj-e-gham-e-jaan hai
ai chaaragaro dard baDha kyun nahin dete

munsif ho agar tum to kab insaf karoge
mujrim hain agar hum to saza kyun nahin dete

rahzan ho to hazir hai mata-e-dil-o-jaan bhi
rahbar ho to manzil ka pata kyun nahin dete

kya bit gai ab ke ‘faraaz’ ahl-e-chaman par
yaran-e-qafas mujh ko sada kyun nahin dete

Leave a Reply