dil ka shahr nagar afsos ka hai

janan dil ka shahr nagar afsos ka hai
tera mera sara safar afsos ka hai

kis chahat se zahr-e-tamanna manga tha
aur ab hathon mein saghar afsos ka hai

ek dehliz pe ja kar dil-khush hota tha
ab to shahr mein har ek dar afsos ka hai

hum ne ishq gunah se bartar jaana tha
aur dil par pehla patthar afsos ka hai

qurbat ke us ped ki shakhon par dekho
phul udasi ka hai samar afsos ka hai

haar ke dukh se pachtawa badh kar hai ‘faraaz’
dukh ka nahin afsos magar afsos ka hai

Leave a Reply