5 Top Ghazals Ahmad Faraz

ahmad faraz Ghazals and Shayari

Top Ghazals Ahmad Faraz

Widely known as one of the most famous modern Urdu poets, Ahmad Faraz's fine but simple writing made him as popular as his peers and friends, legendary poets Faiz Ahmad Faiz and Ali Sardar Jafri.

Read 5 Top Ghazals Ahmad Faraz wrote excellently: 

5. Talash Karte Hai

nahi ki nama-baron ko talash karte hain
hum apne be-khabron ko talash karte hain

mohabbaton ka bhi mausam hai jab guzar jaye
sab apne apne gharon ko talash karte hain

suna hai kal jinhe dastar-e-iftikhar mili
wo aaj apne saron ko talash karte hain

ye ishq kya hai ki izhaar-e-arzu ke liye
harif nauhagaron ko talash karte hain

ye hum jo dhundte phirte hain qatl-gahon ko
dar-asal chaaragaron ko talash karte hain

riha hue pa ajab haal hai asiron ka
ki ab wo apne paron ko talash karte hain

‘faraaz’ daad ke qabil hai justuju unki
jo hum se dar-badaron ko talash karte hain

top ghazals ahmad faraz

top ghazals ahmad faraz

4. Na Seh Saka Jab Masafaton Ke Azab Sare

na seh saka jab masafaton ke azaab sare
to kar gaye kuch meri aankhon se khwab sare

bayaz-e-dil par ghazal ki surat raqam kiye hain
tere karam bhi tere sitam bhi hisab sare

bahaar aai hai tum bhi aao idhar se guzro
ki dekhna chahte hain tum ko gulab sare

ye saaneha hai ki waizon se ulajh pade hum
ye waqia hai ki pee rahe the sharab sare

bhala hua hum gunahgaron ne zid nahin ki
samet kar le gaya hai naaseh sawab sare

‘faraaz’ kis ne mere muqaddar mein likh diye hain
bas ek dariya ki dosti mein sarab sare

top ghazals ahmad faraz

top ghazals ahmad faraz

3. Qarib aa Jao

sukut-e-sham-e-khizan hai qarib aa jao
bada udas saman hai qarib aa jao

na tum ko khud pe bharosa na hum ko zom-e-wafa
na e’tibar-e-jahan hai qarib aa jao

rah-e-talab mein kisi ko kisi ka dhyan nahin
hujum-e-ham-safaran hai qarib aa jao

jo dasht-e-ishq mein bichde wo umr bhar na mile
yahan dhuan hi dhuan hai qarib aa jao

ye aandhiyan hain to shehr-e-wafa ki khair nahin
zamana khak-fishan hai qarib aa jao

‘faraaz’ dur ke suraj ghurub samjhe gaye
ye daur-e-kam-nazaran hai qarib aa jao

top ghazals ahmad faraz

2. Wo Jis Ghamand se Bichda

kashida sar se tawaqqo abas jhukaw ki thi
bigad gaya hun ki surat yahi banaw ki thi

wo jis ghamand se bichda gila to is ka hai
ki sari baat mohabbat mein rakh-rakhaw ki thi

wo mujhse pyar na karta to aur kya karta
ki dushmani mein bhi shiddat isi lagaw ki thi

magar ye dard-e-talab bhi sarab hi nikla
wafa ki lahr bhi jazbaat ke bahaw ki thi

akele paar utar kar ye nakhuda ne kaha
musafiro yahi qismat shikasta naw ki thi

charagh-e-jaan ko kahan tak bacha ke hum rakhte
hawa bhi tez thi manzil bhi chal-chalaw ki thi

main zindagi se nabard-azma raha hun ‘faraaz’
main jaanta tha yahi rah ek bachaw ki thi

top ghazals ahmad faraz

1. Nazar Bujhi to

nazar bujhi to karishme bhi roz-o-shab ke gaye
ki ab talak nahin aaye hain log jab ke gaye

karega kaun teri bewafaiyon ka gila
yahi hai rasm-e-zamana to hum bhi ab ke gaye

magar kisi ne humein hum-safar nahin jaana
ye aur baat ki hum sath sath sab ke gaye

ab aaye ho to yahan kya hai dekhne ke liye
ye shehr kab se hai viran wo log kab ke gae

girafta-dil the magar hausla na haara tha
girafta-dil mein magar hausle bhi ab ke gaye

tum apni sham-e-tamanna ko ro rahe ho ‘faraaz’
in aandhiyon mein to pyare charagh sab ke gaye

Thanks for Reading: 5 Top Ghazals Ahmad Faraz

Powered By 360Presence

top ghazals ahmad faraz

This Post Has 4 Comments

Leave a Reply